Sakanako bizikleta-bideak Irurtzun eta Ziordia lotzen ditu, eta HORIZONTALA korridorearen Nafarroako zatia da. Marka hori Arabako Lautadako bizikleta-bidearekin batera sortu da, Sakana eta Agurain lotzen dituen bizikleta-ibilbidea identifikatzeko.
Sakanako bizikleta-bidea Irurtzun eta Ziordia lotzen dituen mugikortasun aktiborako azpiegitura da. Ibilbide nagusiak 46,3 kilometro ditu, eta herrietarako, industrialdeetarako, zerbitzuetarako eta garraio publikoko guneetarako 12 lotune ditu. Guztira, 67 kilometro inguruko sarea osatzen du.
Proiektuaren helburua Sakanako herrien arteko joan-etorriak oinez edo bizikletaz egiteko aukera seguruagoak eskaintzea da. Horrela, eguneroko mugikortasuna errazten du, ibilgailu pribatuarekiko mendekotasuna murrizten laguntzen du eta eskualdeko herrien arteko lotura indartzen du.
Ibilbidea egiteko, lehendik zeuden bideak egokitu eta hobetu dira, eta beharrezkoa izan den guneetan bide-zati berriak eraiki dira. Horrez gain, seinaleztapena, atsedenlekuak, bizikletentzako aparkalekuak eta mantentze-puntuak jarri dira. Bizikleta-bideak Altsasu, Etxarri Aranatz eta Uharte Arakilgo tren-geltokiekin eta autobus-zerbitzuekin lotzeko aukera ere ematen du.
Sakanako bizikleta-bidea eskualdeaz gaindiko sare baten parte da. Irurtzunen Plazaolako Bide Berdearekin eta Eurovelo 1 bidearekin lotzen da; Ziordian, berriz, Arabako Lautadako bizikleta-bidearekin, Aguraineraino jarraituz. Sakana eta Arabako Lautada lotzen dituen ibilbide osoa HORIZONTALA marka partekatuaren bidez aurkezten da.
Erakunde honek Nafarroako Gobernuaren diru-laguntza bat jaso du, eskualdeak suspertzeko planak prestatu eta gauzatzeko diru-laguntzen 2023ko deialdian.
Erakunde honek Nafarroako Gobernuaren dirulaguntza bat jaso du Europako 2023 proiektuen sustatzaileak eta kudeatzaileak kontratatzeko laguntzen babesean.
